ცხინვალში, შშმ პირი უკრაინის ომიდან დაბრუნებულმა, ყოფილმა პატიმარმა მოკლა, რომელიც ფრონტზე "ვაგნერის" რიგებში იბრძოდა - პრიგოჟინის სამხედრო დაჯგუფებამ მისი გამართლება სცადა
გუშინ გავრცელდა ინფორმაცია, რომ ცხინვალში, სოფელ დმენისის მცხოვრები, 38 წლის სოსლან ვალიევი მოკლეს. მამაკაცი, რომელიც, როგორც ირკვევა, შშმ პირი იყო, დანით მიყენებული ჭრილობის შედეგად საავადმყოფოში გარდაიცვალა.
ცხინვალის ე.წ. პროკურატურის ინფორმაციით, მკვლელობაში ბრალდებული, 1989 წელს დაბადებული გიორგი სიუკაევია, რომელიც ცხელ კვალზე დააკავეს.
დაკავებამდე ცოტა ხნით ადრე "სამხრეთ ოსეთის“ ე.წ. პრეზიდენტმა ალან გაგლოევმა საგანგებო შეხვედრა გამართა ძალოვანი სტრუქტურების ხელმძღვანელებთან.
როგორც ირკვევა, ბრალდებული კერძო სამხედრო დაჯგუფების "ვაგნერის" ყოფილი წევრია, რომლის დამფუძნებელიც "პუტინის მზარეულად" წოდებული ევგენი პროგოჟინია.
ის ნასამართლევი იყო და ცხინვალში უკრაინის ფრონტიდან სულ ახალხან დაბრუნდა.
"სიუკაევი "ვაგნერში" საპატიმროდან მოხვდა, სადაც 2014 წლიდან მოყოლებული ადამიანის მკვლელობისთვის იხდიდა სასჯელს. ის დონბასში საბრძოლველად მოხალისედ წავიდა", - ვკითხულობთ "ტელეგრამ-არხებზე" გავრცელებულ ინფორმაციაში.
მომხდარს გამოეხმაურა "ვაგნერი", რომელმაც სცადა გაემართლებინა სიუკაევის ქმედება. მათი ცნობით, აწგარდაცვლილი ვალიევი "ხშირად იყო ალკოჰოლური თრობის ქვეშ და ამ კონკრეტულ შემთხვევაში, უცენზურო გამოთქმებით შეურაცხყოფას აყენებდა მოქალაქეებს".
"ვალიევი მივიდა მანქანასთან, რომელიც ლენინის ქუჩაზე იყო გაჩერებული და ამ ავტომობილის მგზავრების შეურაცხყოფა დაიწყო, რის შემდეგაც მათ დახმარებისთვის მიმართეს გამვლელ სიუკაევს, რომელმაც ისინი დაიცვა. კონფლიქტის შედეგად სიუკაევმა ვალიევს რამდენიმე ჭრილობა მიაყენა დანით, რის შედეგადაც ეს უკანასკნელი გარდაიცვალა", - ვკითხულობთ პროგოჟინის პრესსამსახურის განცხადებაში.
თუმცა ახლობლების თქმით, სოსლან ვალიევი, მეტსახელად, "ცუგრი" კეთილი და უწყინარი ადამიანი იყო.
აღსანიშნავია, რომ "ვაგნერმა" პატიმრების რუსეთ-უკრაინის ომში წაყვანა აქტიურად გასული წლის ზაფხულიდან დაიწყო. მათი ზუსტი რიცხვი უცნობია, თუმცა მათგან ბევრი დაიღუპა ფრონტზე, გადარჩენილებს პრიგოჟინი დაჰპირდა, რომ 6 თვეში შეიწყალებდნენ. ცნობილია შემთხვევები, როდესაც ყოფილი პატიმრები ომიდან მართლაც დაბრუნდნენ საცხოვრებელ ადგილას. მათ შორის იყო ბრალდებული სიუკაევიც. პრიგოჟინის მტკიცებით, მათგან განმეორებითი დანაშაულის ჩადენის შემთხვევები ძალიან ცოტაა, თუმცა ამის თაობაზე ოფიციალური სტატისტიკა არ არსებობს.