პესკოვის ვაჟი სისასტიკით ცნობილი "ვაგნერის" რიგებშია და უკრაინაში იბრძვის: რას ამბობს ნიკოლაი პესკოვი, რომელიც ადრე მობილიზაციას "თავს არიდებდა"
რუსეთის პრეზიდენტის პრესმდივნის დიმიტრი პესკოვის ვაჟმა, ნიკოლაიმ, "კომსომოლსკაია პრავდას“ კორესპონდენტთან ინტერვიუში ისაუბრა საომარ ზონაში, "ვაგნერის" რიგებში მსახურობის შესახებ.
ნიკოლაი პესკოვის თქმით, საომარ ზონაში წასვლა მისი პირადი ინიციატივა იყო. "ჩემ მოვალეობად მივიჩნიე. უბრალოდ უნდა მიმეღო მონაწილეობა", - ამბობს ის.
ნიკოლაი ჰყვება, რომ როდესაც გადაწყვეტილება მიიღო, მამას მიმართა, რათა "ვაგნერთან" დაკავშირებაში დახმარებოდა. ნიკოლაის თქმით, მამამ მხარი დაუჭირა მის გადაწყვეტილებას, თუმცა, რა თქმა უნდა, "შეწუხდა ისევე, როგორც მთელი ოჯახი."
”ჩვენ ყველანი შევიკრიბეთ. როდესაც ჩემი გადაწყვეტილების შესახებ გამოვაცხადე, ყველამ მხარი დამიჭირა. მკითხეს, დარწმუნებული ვიყავი თუ არა და მესმოდა თუ არა, სად მივდიოდი - რაზეც ვუპასუხე: "დიახ,“ მათ მითხრეს: "წინ“.
პესკოვის უფროსმა ვაჟმა განმარტა, რომ მას "ვაგნერის" შესახებ ჯერ კიდევ მაშინ ესმოდა, როდესაც სამხედრო ჯგუფის წარმომადგენლები სირიაში იბრძოდნენ: "ეს რაღაც ფანტასტიკურ ფილმად მეჩვენებოდა. ამ დროს რეალობა იყო“, - ამბობს ნიკოლაი.
ექვსი თვის განმავლობაში ნიკოლაი მუშაობდა არტილერისტად, სხვა სახელი - მისმა არც ერთმა კოლეგამ არ იცოდა, რომ ის იყო რუსეთის პრეზიდენტის პრესმდივნის ვაჟი. პესკოვის ვაჟმა დასძინა, რომ ის "გიჟურად ამაყობს" თავისი ვაგნერელების ოჯახით.
- ცნობისთვის, გასული წლის სექტემბერში რუსი ოპოზიციონერი პოლიტიკოსის, ალექსეი ნავალნის მხარდამჭერებმა ნიკოლაის დაურეკეს, გაეცნენ როგორც სამხედრო აღრიცხვისა და გაწვევის ოფისის თანამშრომლები და შესთავაზეს, მობილიზაციის ფარგლებში კომისარიატში მისულიყო. რაზეც ნიკოლაიმ უპასუხა: "თქვენ უნდა გესმოდეთ, რომ მე ვარ ბატონი პესკოვი და სწორი არ არის ჩემი იქ ყოფნა. მოკლედ, ამას სხვა დონეზე გადავწყვეტ", - ასე უპასუხა პესკოვმა სატელეფონო ზარს, თუმცა ახლა ამბობს, რომ როდესაც დაურეკეს, ის უკვე "ვაგნერში" წასასვლელად ემზადებოდა.
